У канцы мінулага тыдня адбылося ўрачыстае закрыццё Summer School BNTU 2.0. Яе ўдзельнікамі сталі 11 студэнтаў сумеснага факультэта БНТУ — ТДТрУ, якія вучацца па сумеснай адукацыйнай праграме “2+2”.
На працягу тыдня, пачынаючы з 25 ліпеня, навучэнцы з цікавасцю знаёміліся з Беларускім нацыянальным тэхнічным універсітэтам і Мінскам, а 1 жніўня, атрымаўшы мноства незабыўных эмоцый, адправіліся на радзіму.
— Ідэя стварэння летняй школы ўзнікла год назад. Пры выбары навучальнай установы, асабліва за мяжой, кожнаму абітурыенту важна разумець, дзе ён будзе жыць і вучыцца. Нам хацелася стварыць праект, які дапамог бы абітурыентам пазбавіцца сумненняў наконт паступлення ў БНТУ. Так і прыйшла ідэя арганізаваць летнюю школу. Яе праграма распрацавана не толькі для абітурыентаў, якія думаюць наконт паступлення ў вядучую тэхнічную УВА Беларусі, але і для студэнтаў, якія вучацца па сумесных адукацыйных праграмах, і выкладчыкаў УВА-партнёраў, — расказала начальнік аддзела міжнародных праграм, абменаў і пратакола факультэта міжнароднага супрацоўніцтва БНТУ Настасся Волкава.
Сутнасць адукацыйнай праграмы “2+2” у тым, што першыя два гады студэнты вучацца ў Ташкенцкім дзяржаўным транспартным універсітэце, а 3 і 4 курс — у Беларускім нацыянальным тэхнічным універсітэце. Выпускнікі атрымліваюць дыпломы двух універсітэтаў.
Першы заезд летняй школы адбыўся ў ліпені мінулага года, стаўшы выдатнай магчымасцю для студэнтаў з Ташкента загадзя зразумець, што іх чакае пасля прыезду ў Мінск. У нас яны наведалі лекцыі і майстар-класы, лабараторыі і найбуйнейшыя прадпрыемствы Беларусі, а таксама азнаёміліся з культурай, гісторыяй і традыцыямі нашай краіны.
— Арганізатар праекта — крэатыўная маладая каманда аддзела міжнародных праграм, абменаў і пратакола факультэта міжнароднага супрацоўніцтва БНТУ. Яго прадстаўнікі рыхтуюць для ўдзельнікаў цікавую праграму і суправаджаюць іх на працягу ўсяго праекта. У цэлым задзейнічана шмат падраздзяленняў і выкладчыкаў БНТУ, якія знаёмяць юнакоў і дзяўчат з іх будучай альма-матар. А яшчэ пра нашых гасцей клапоцяцца кухары, каб замежныя госці заўсёды былі сытыя і мелі магчымасць прадэгуставаць і атрымаць асалоду ад нацыянальнай беларускай кухні, а таксама работнікі інтэрната і санаторыя, вадзіцелі, студэнты-валанцёры БНТУ, якія дапамагаюць удзельнікам школы адаптавацца да новых умоў, — дадала Настасся Русланаўна.
Сумесны факультэт БНТУ — ТДТрУ функцыянуе з 2019 года. Вынікам супрацоўніцтва дзвюх УВА стаў шэраг заключаных пагадненняў па стварэнні сумесных адукацыйных праграм.
Акрамя таго, летняя школа накіравана на ўмацаванне супрацоўніцтва паміж БНТУ і УВА-партнёрамі і на развіццё сяброўскіх адносін паміж народамі Беларусі і краін — удзельніц праекта.
Па словах Н.Р.Волкавай, для арганізатараў самае галоўнае — бачыць зацікаўленыя вочы
ўдзельнікаў:
— Мы вельмі любім наш універсітэт і ўкладваем душу ў кожны праект. Выключэннем не стала і летняя школа. Калі ўдзельнікі ўсім задаволены і з нецярпеннем чакаюць свайго прыезду ў БНТУ — значыць, у нас усё атрымалася і хутка да нас завітаюць зацікаўленыя студэнты.
Пасля завяршэння летняй школы яе ўдзельнікі атрымалі сертыфікат аб яе праходжанні.
Вольга АНТОНЕНКАВА.
Па матэрыялах https://nastgaz.by/.